【Now財經台】中國油氣控股(00702)今朝復牌，早段一度抽高50%，公司上周五收市後出通告，指獲喺A股上市嘅九豐能源入主，參與中國油氣股權重組，但冇及其他交易細節，雖然股價一度衝高，但之後無以為繼，中午前升幅已縮到得返3%，點解會出現呢個情況？
《香港股票財技密碼》作者梁杰文指，有大公司入主係好消息，中國油氣本身負債較高，加上半年前出業績時都出過問題，甚至比人入稟申請清盤，依家搵到個大靠山入主，認購股份比例又高，基本上公司控股股東及控股權已經易手，依家中國油氣市值逾4億元，今次發行咁大量股分，估計涉及約10億元，應該可以解決公司短期債務問題。
不過，Mike認為，港股市況咁差一定會拖累中國油氣股價，眼見股價一路跌，加上諒解備忘錄冇法律效力，最終個協議可能簽唔成，再睇咪依家嘅市況，都好難吸引投資者高追。
