【Now財經台】ESR(01821)午後同大市一樣跌幅擴大,一度低見15.36元,挫逾6.6%,股份暫時連跌第11日,累跌逾20%,股價咁弱勢,除咗市況唔好,亦受一啲消息影響。
集團最新公布1宗關連交易,借咗5000萬美元畀兩名董事共同持有嘅公司,而貸款年利率係倫敦銀行同業拆息(LIBOR)加4厘,ESR財務尚算健康,但始終市況唔好,經濟前景不明朗,投資者可能擔心公司亂借錢出去。
ESR今年5月中開始,個個月都有做回購,股價喺19元至22元上落,10月跌穿咗呢個頂後,跌勢加劇,今日落到2年半低位,14天RSI亦跌至13嘅極超賣水平,後市可能要落到15元先有支持。