【Now財經台】內險股下星期會陸續出第3季業績，多隻內險股月初跌至近年新低後，股價至今一直橫行，究竟季績前應該點部署？
英皇證券研究部總監陳錦興認為，內險股第3季業績應該冇驚喜，因為內地保險業務仍未全面復甦，預期今季至明年第1季先有望顯著復甦，當中較睇好中國人民保險集團(01339)，指集團旗下分別有主營壽險及財險嘅公司，估計第3季新業務價值表現會較同業穩健。
內險股中，中國財險(02328)今年股價走勢一浪高於一浪，明顯跑贏同業，周一更發咗盈喜，股價今日曾高見8.42元，升1%。
不過，大行畀嘅目標價好貼近現價，其中瑞信睇8.8元，仲低過9月中高位8.87元，比較樂觀嘅瑞銀就睇9.7元。Stanley指出，財險股價已反映咗唔少盈喜消息，同埋市場早前對財險業務嘅憧憬，暫時未有較強股價催化劑。
