【Now財經台】APOLLO出行(00860)喺2017年開始轉型，進軍電動車業務後獲唔少名人投資，包括有李嘉誠、澳門前特首何厚鏵家族，雅居樂集團(03383)仲用溢價入股，但雅居樂已經喺去年12月退出，而李嘉誠都喺同月減持，如果單睇股東陣容對投資者有咩啟示?
《香港股票財技密碼》作者梁杰文話，股東陣容係星光熠熠，唔單止有內地發展咗好耐嘅車企，亦有澳門及香港一啲老牌家族，股東嘅資金實力雄厚，甚至有內地國企或市政府企業資金，所以設廠時好易獲得當地政府支持。
梁杰文又話，近排個別電動車股股價跌至近年低位，但兩三年前成個社會都蜂擁投資電動車行業，令好多電動車股股價炒高咗，所以對APOLLO股東陣容星光熠熠唔感到意外，因為呢兩三年都有唔少投資者想分一杯羹，紛紛注資旗下或自己嘅心水電動車公司。
值得留意係，雅居樂去低退出時，將手上APOLLO出行持股，換取一家叫威馬汽車嘅股權，Mike認為，唔排除雅居樂真正目標係呢間車企，而威馬持有APOLLO出行逾28%股權，意味雅居樂未有退出電動車相關投資。
