【Now財經台】高盛認為，隨著風電行業成本競爭力改善，全球趨向「減碳」，估計2022至2025年間，風電總裝機複合年增長率將升至22%，行業收入及毛利將帶動股價上揚，但風電股表現就唔係咁爭氣，金風科技(02208)、龍源電力(00916)、新天綠色能源(00956)、大唐新能源(01798)股價，過去1年累跌約30%至近60%，舊年國家補貼結束後，一直缺乏增長亮點，依家高盛唱好風電股，係咪可以趁低位買入？
艾德金融聯席董事陳政深指，同意高盛報告嘅方向，「十四‧五」規劃提及，可再生能源發電量喺全社會用電量佔比，至2025年將超過一半，依家風電、太陽能等發電量佔比合共不足10%，所以增長空間好大。中國去年新增裝機容量全球第1，佔全球新增裝機容量51%，反映中國重視可再生能源，而風電係比較重要嘅選擇。
Ryan相信，未來高效率嘅海上裝機會慢慢增長，長遠而言，對風電股毛利率係有一個正面作用。佢又話，參考市場對風電股嘅未來估值，例如金風市盈率(PE)只係單位數，就算唔會出現爆炸性增長，但以估值計，仍然喺合理水平。
