【Now財經台】受旭輝控股集團(00884)冇如期還債息嘅消息拖累，內房物管股今日捱沽，包括同系旭輝永升服務(01995)。
旭輝永升今朝輕微高開後隨即掉頭急挫，旭輝中午出通告澄清後，旭輝永升股價仍未止瀉，午後一度重挫逾15%，低見1.96元，跌至2019年2月以來低位。
受旭輝拖累，旭輝永升市值由2021年1月高峰451億人仔，大幅縮水至現時僅約34億人仔，仲少過公司嘅手頭現金，反映市場對旭輝系信心非常薄弱，市場擔心一旦旭輝冇錢還，可能會打旭輝永升主意。
旭輝永升股價今年已累跌83%，即使今日連2元都守唔住，但都係冇乜承接。雖然旭輝永升本業表現唔錯，但旭輝債務問題一日未解決，相信股價都好難扭轉弱勢，現階段撈底好危險。
