【Now財經台】截至早上11時止，1小時內《彭博》用戶關注度上升最多港股，依次為協鑫科技(03800)、美團(03690)、中銀航空租賃(02588)、中國銀行(03988)及小米集團(01810)。
協鑫科技今朝股價一度急挫逾12%，開市冇耐就跌穿2元，低見1.93元。系內協鑫新能源(00451)跌得更勁，半日最多插38%，低見0.037元。
自公司8月底公布，以協鑫新能源股份代替中期股息，每1000股協鑫科技獲派318股協鑫新能源股份，公司股價已累跌超過30%，協鑫新能源更累跌逾60%，涉及股份噚日已寄出，今日似乎係投資者一收到股份，就即時沽貨推冧股價？
獨立股評人譚智樂認為，除咗上述原因，協鑫系股價急跌，亦因為依家市場對高槓桿、高負債嘅公司有戒心，而協鑫系向來財務狀況麻麻，建議投資者短線止蝕離場。
Arnold又指，光伏玻璃行業有產能過剩風險，現時光伏玻璃價格有下行趨勢，加上行業內好多公司嘅負債水平偏高，現階段唔適宜估底。
