【Now財經台】出口股敏華控股(01999)下個月會出中期業績，大和估計，受中美市場不利因素夾擊，第3季整體收入會出現倒退，不過，由於原材料價格及運費壓力紓緩，預期中期淨利潤率有機反彈，敏華嘅中期成績表值唔值得憧憬？敏華股價今日再創近兩年半新低，但好快就收復失地，仲跑贏大市，依家係咪重新吸納嘅時機？
華盛証券經紀部董事李偉傑認為，市場會較關注敏華收入，第2季內地嘅封城措施對零售銷售影響唔細，而內地業務佔比高逾60%，但成本下降相信會係一個亮點，亦有利整體毛利表現，而另一個關注點會喺新廠房嘅情況。
股價方面，Jason就話，敏華股價今日表現已經唔錯，但睇返技術走勢，中短期仍受制於20天線水平，即5.4元水平，其實之前都突破過，但之後又守唔住，建議等股價可以企穩呢個水平再考慮，現價吸引力亦唔大，如果冇貨可以等回落至3.6元至4元，同埋出完業績再買入。
