【Now財經台】受制裁消息拖累，中國建築(03311)連跌第3個交易日，今朝輕微低開，午後最多跌逾4%，低見7.22元，創今年低位，收市報7.28元，跌逾3%。
中國海外發展(00688)持股逾60%嘅中國建築包辦本地唔少公營房屋嘅建築工程，股價喺舊年10月《施政報告》發表前後炒上，但上周五(7日)收市跌6%。
花旗最新報告指，上周五股價沽壓或與美國國防部發表喺美國直接或間接營運嘅中國軍事公司嘅最新名單有關，因為中間有一個叫China State Construction Group Co.，同中國建築嘅英文名類似，但花旗提醒，中國建築嘅英文名叫做China State Construction International Holdings Limited，認為美國國防部份名單並唔係指中國建築。
花旗又指，下個星期三發表嘅《施政報告》或再成為股價催化劑，因為香港可能會加大應用組裝合成法去起公屋，而公司嘅組裝合成法係香港有領導地位。而公司將會喺25號出第3季營運數據，該行預計會有10%多增長，並重申「買入」評級，維持目標價15元。
集團股價自9月中旬走勢明顯轉差，今年跌25%，但跌到呢個水平，股息率仲有6厘，或者會對股價有返啲支持。
