【Now財經台】銷售風力發電相關產品及營運風場嘅中國航天萬源國際(01185)今日復牌，股價一度急瀉逾41%，低見0.09元。集團舊年4月開始停牌，上周五出通告話已達成所有復牌條件，股份今朝復牌。值得留意係，航天萬源負債淨值逾16億港元，可以復牌係咪因為背後有揸住60%股權央企中國航天科技撐？股份今日復牌會急瀉，之前控股股東應承會2年內會提供財務支持，點解仲係比唔到信心投資者？
《香港股票財技密碼》作者梁杰文指，航天萬源有冇足夠嘅業務及資產營運，以獲得上市地位，呢方面港交所(00388)係有酌情權，所以即使收益少、負債水平咁得人驚，但因為母公司係央企，都會「側側膊」比佢復牌。
Mike又認為，雖然航天萬源有控股股東嘅「2年承諾」，但集團大部分都係流動負債，即係短期內要還清，因此，投資者認為，公司復牌係為咗補充現金流，沽貨股東都心水清，知道復牌係最後逃生門，再揸落去隨時傳嚟供股集資消息。
