【Now財經台】海昌海洋公園(02255)今朝低開逾1%後，跌幅擴大，下晝返嚟見埋日內低位，一度跌逾14%，失守7元關口，成交股數較過去100日同時段平均成交增4倍。
集團開市前出通告，計劃將股份1拆2，但維持每手買賣股數1000股，公司解釋，拆細目的係降低交易價差、價格波動性、擴闊股東基礎，但需要喺股東特別大會獲得批准先可以成事，依家海昌海洋公園一手約7000元，拆細後就約3500元。
技術走勢方面，海昌海洋公園今年表現強勢，今年暫時累升1.2倍，雖然股價今日大跌，但仍處於相對高位，如果由3月展開嘅升浪開始起計，升到7月8.57元見頂回落，拉出嚟嘅黃金比率，股價已失守0.236，即7.05元水平，下一個支持位可以留意0.382，即6.09元水平。
