【Now財經台】華領醫藥(02552)股價今朝好chok，大幅抽高後再急回，股價高開近15%後，升幅一度擴大至逾24%，高見4.9元，但之後升幅不斷收窄，其後更轉跌，成交股數較過去100日同時段平均成交激增50倍。
集團噚晚出通告，話公司研發嘅全球首創新藥「華堂寧」，喺10月8日獲得中國國家藥品監督管理局批准上市，但係睇返通告，冇詳細交代呢隻藥可以為公司帶嚟幾多潛在收益。
今朝早段市場見到華領有第1個商業化項目，就好興奮咁衝入場，但興奮情緒好快降溫，未來要再有催化劑，可能要睇商業化後，銷售情況及售價等因素。
