【Now財經台】思摩爾國際(06969)再創上市新低，今朝輕微低開後，跌幅隨即擴大，午後更一度破底，低見8.52元，挫逾7%。
消息面上，美國FDA(食品藥物管理局)逐漸收緊監管，內地亦由10月起，實施電子煙強制性國家標準，令市場擔心電子煙行業前景。雖然思摩爾出通告，指有6家子公司獲煙草專賣生產企業許可證，但係咁嚴格嘅規例下，思摩爾又係咪可以做返靚盤數？市場係持觀望態度，集團上半年少賺近52%。
思摩爾股價由6月底開始尋底，雖然公司期間做過回購，大股東陳志平亦有增持，但股價仍連跌3個月，累跌65%，依家14天RSI已落到18嘅極超賣水平，但仲未跌到3月低位，加上今日喺低位都未見有大量買盤吸納，股價難言見底，即使後市出現反彈，估計上到14.3元，即之前嘅支持位，相信會有阻力。
