【Now財經台】截至早上11時止，1小時內《彭博》用戶關注度上升最多港股，依次為安踏體育(02020)、李寧(02331)、華晨中國(01114)、中國平安(02318)及申洲國際(02313)。
安踏、李寧上晝曾升逾9%，申洲更一度彈13%，體育用品股今朝造好，相信係受北京11月復辦馬拉松嘅消息帶動，今次係北京今年2月冬季奧運以來，再度舉辦嘅大型公眾活動，適逢內地國慶黃金周嘅傳統消費旺季，復辦體育盛事相信有助催谷體育用品銷情。
摩根士丹利特別唱好上榜嘅的安踏與李寧，認為兩者短期下行空間有限。不過，獨立股評人譚智樂認為，體品股係因為早前嚴重超賣，配合內地放寬防疫措施嘅消息，今日先會大幅反彈，佢又話，唔排除短期內會再夾多浸，但唔代表體品股轉勢。
Arnold分析指，李寧中期業績一般，毛利率又出現下行趨勢，而申州嘅供應鏈問題未有解決跡象，單靠內地放寬防疫政策嘅憧憬，較難支持板塊持續向好。
佢建議，如果想短炒李寧，目標價睇68元，安踏就睇95元。
