【Now財經台】中遠海運港口(01199)今朝低開逾3％後，跌幅逐步擴大，午後跌勢加劇，一度重挫逾12%，低見4.35元，但股份交投淡靜，反映股價係咁跌都冇人想接貨，股價最新續於低位徘徊，成交股數較過去100日同時段平均增不足1倍。
中遠海運去年9月宣布擬收購德國漢堡港，不過，雙方遲遲未能達成交易協議，睇返中遠海運股價反應，投資者似乎唔多睇好呢單交易，摩根士丹利上星期都下調咗公司3年盈利預測及目標價。
集團股價近排出現異動，上周曾短暫重上5元，但好快又掉頭向下，股價喺去年5月及今年2月分別做咗雙頂，之後股價就顯著回套，到依家仍然喺3月以來嘅下行通道，後市要觀望會唔會下試通道底，即4元水平，一旦失守，可能真係進一步確認走勢轉差。
