【Now財經台】周黑鴨(01458)股價上午走勢平平無奇，但午後成交突然大增，股價一度升近14%，高見4.39元，收報4.3元，仍大升逾11%，成交股數較過去100日同時段平均增近2倍。
板塊消息面上，市場炒緊「十‧一」國慶長假期，由於入境內地仍要遵守嚴格嘅隔離政策，所以只能選擇國內旅遊，餐飲品牌都捉緊機會谷銷情，周黑鴨亦推出優惠。不過，集團上半年收入按年跌18%，而下半年有啲月份都有疫情封控措施，未知可唔可以靠國慶長假期追返。
周黑鴨股價喺3元水平橫行咗一段時間，今日升穿50天及100天線，14天RSI就升至67，暫時仲未超買，短線可上望250天線，即5元水平，後市要留意有冇消息跟尾，會唔會炒完國慶長假期後，就無以為繼。
