【Now財經台】依家喺港銀存錢想收高息，多數揀港元、美元及人仔，相對之下，英鎊及其他外幣因貸款需求小，因此，即使英倫銀行加息都冇高息收，如果睇匯率及息口，係咪美元前景最好？
上海商業銀行研究部主管林俊泓指，3種貨幣前景依次為美元、港元、人仔，內地依家仲處於減息周期，息口較美元低，加上人仔波動性較大，所以會係較次嘅選擇，至於美元及港元，美元嘅息口一直高過港元，睇返歷史，港元息口追上及超越美元嘅機會好細，一般而言，當美國開始減息，香港又未反應得切時，港元息口先會高過美元，長線部署策略上，喺加息周期都係主要考慮美元，到開始減息時先將存款轉返去港元。
