【Now財經台】疫情對食肆影響好大，主要經營拉麵店「豚王」嘅創業板股份賞之味(08096)，計劃按「2供5」比供股集資，供股價0.3元，較上周五收市價折讓約14%，集資最多逾4000萬元，事實上，集團業績都唔係咁好，公司喺香港、內地及澳門都有拉麵店，係咪經營上已經去到水深火熱嘅地步，因為融資難唯有向小股東「伸手」？
《香港股票財技密碼》作者梁杰文話，雖然依家逐步通關，但好難估計明年會唔會再有新一波疫情，要再收緊防疫措施，雖然防疫措施會影響餐飲業，但應該對中式酒樓影響較大，拉麵店似乎冇直接影響，只要市民多啲外出消費，集團營業額有望逐漸復常，依家未至於去到水深火熱嘅地步，雖然公司近幾年虧損擴大，但負債水平好低，問題係流動資金已用得七七八八，想維持營運狀況無可避免要向小股東「伸手」。
