【now.com財經】今朝喺作戰室出嘅好倉，喺今朝10點半時指數喺五分鐘圖上行出「圓頂」走勢，其實當時指數已經失咗保歷加通道中軸，向來一失中軸都會做出反手動作，但今日就被「圓頂」頸線呢個魔鬼吸引咗，遲咗走人，輸咗我家肥貓幾包零食。即時反手指數其後幸好有再向下回落，但11點打後開始，阿市又食咗幾淡豬油，還好指數喺最後15分鐘都穿過18,000點樓下，反手淡倉總算補到朝早失利之餘，仲還番兩包零食比我家肥貓。
今日Lunch time有局出咗去，最唔好彩嘅係平時坐開架巴士玩改道，仲要永久嗰隻，時間嚴重失預算，或者下一次我用個穩陣啲嘅方法先。
下半場開市時見到指數一支箭咁向上衝高，應該都同今日下晝3點半會講新檢疫政策有關，作戰室今日除咗搞條恒指之外，都有搞下隻國泰(00293)，梗有戰友一早坐定隻國泰正股，今鋪未出發，先興奮。
至於隻M通Put(10573)，都講過唔會係玩即日鮮嘅Trade，所以都準備要過Weekend，依家2點11分，睇返隻(10573)證價做緊0.173元，最高見過0.174元，呢鋪當自己煲老火湯，煲還煲，記得睇火。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
