【now.com財經】今朝掛住睇恒指個月線圖嚟度下指數下一個終極低位會去到邊,作戰室都只係出咗注好倉,速食之後就等中午放飯。
本身諗住等下半場指數開市之後,睇返恒指五分鐘圖條保歷加通道有無拓闊返先至再出手,但1點8分,指數老老鼠鼠開市後都只係沿窄窄的保歷加通道橫行,拍晒烏蠅。
都慣咗架啦,呢期指數都只係食得到開市後第一Round,之後真係等收市,或者完場之前吼下有無位出注過夜博,等第二日瞓醒變摩托。
反正指數向下殺到落18,000點之後都要啲時間平復下,唔搞指數住,搵第二啲嘢玩,今次搞嘅都唔係個股,係條MSCI中國A50互聯互通指數,即係A5C。
根據港交所(00388),呢條指數嘅編制係基於MSCI中國A股指數,後者係一條行業覆蓋廣泛嘅指數,成份股包括喺上海及深圳股票交易所上市嘅大型同中型市值中國A股,而呢堆成份股可透過滬股通及深股通嘅北向交易渠道進行買賣。換句話說,A5C係直接參與緊A股市場,同嗰堆A股交所易買賣基金(ETF)隔一層係有分別的。
捉佢出嚟最主要嘅原因人民幣匯價係咁跌,A股以人仔報價,某程度上都間接受傷中。同時鮑爺講到明之後都會繼續大大力咁加息,係預期美金愈來愈強,人仔將會愈來愈弱,咁A5C都未必會走得靚仔。
睇返A5C嘅日線圖(港交所同發行商網站都會有),見到指數由今年4月下旬至5月初開始,行到7月時見2,550點樓上,並出現「上升通道」,惜其後轉下行,至今回落到約2,200點水平,「下降通道」亦清晰可見,兩者配合生成「倒V」走勢,頸線隨時下望4月下旬至5月初的約2,110至2,120點附近。
M通Put(10573),行使價1,900點,同現價有逾11%距離,唔算係貼價貨,但約7.08倍嘅槓桿都真係幾吸引,睇過仲要係所有價外Put中槓桿最高添,引伸波幅普通,唔係最高亦都唔係最低。
如果搵Real time五分鐘圖的話,港交所個Website幫到你,不過佢只係得山形圖,亦都不設技術指標比你界線,又咁講,呢個都唔似係短線Trade,睇睇今日會唔會係因為啱啱加完息所以美金企得比較硬同高,過一排等佢回軟返少少時,小小地一注落場試下水溫先啦(下次美國加息係11月呀!)
作者阿珊,任財經/投資版傳媒人十幾年,《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證,唔貪心,志在搵餐下午茶。