【Now財經台】據《彭博》報道，美國大型銀行如富國銀行、美國銀行及摩根大通，最近開始縮減商業物業借貸生意規模，摩根士丹利及高盛就喺承造新商業物業貸款時，會「揀客」及收緊貸款額。
資深經濟師羅家聰指，銀行為免壞帳增加而「落雨收遮」係好正常，首當其衝一定係息口敏感、高槓桿嘅樓市、債市，但個人信貸暫時唔會受影響。
大行收緊借貸另一個原因係聯儲局要加強銀行業監管，要求銀行作出更多資本嘅規定，大型銀行高層更要出席2場美國國會聽證會。摩通行政總裁戴蒙指，必定會影響銀行放貸能力，不利美國經濟。
KC坦言，銀行濫放貸款嘅始作俑者其實係聯儲局，大型銀行只係推波助瀾。佢又認為，今個經濟下行周期會持續較耐，不過，唔會好似2020年爆發疫情時咁多公司出事，可能聯儲局最終唔會加大銀行監管力度，等需要「及時雨」嘅企業仍可以借到錢。
