【股市脈搏】諾誠健華短線要睇實呢個位

【Now財經台】諾誠健華(09969)A股今日喺上交所科創板上市，發行價11.03元人幣，股價由頭「潛」到尾，一度跌至9元人幣邊緣，較發行價低逾15%。

至於諾誠健華H股今日都要跌，股價今朝平開後，隨即向下，曾低見8.96元，大跌逾17%，成交股數較過去100日同時段平均增4倍。

諾誠健華去年3月指計劃回A，當時股價約13元，約4個月後升至上市新高32元，但之後跟隨成個生物科技板塊向下，及至今年4月中，公司確認回A獲批，但對股價嘅刺激作用已經唔大。

B仔股研發周期長，加上科研費龐大，相信距離公司要錄得盈利仲有好大段距離，短線要留意股價守唔守得住招股價8.95元。