【Now財經台】毛記葵涌(01716)噚日公布，任命《am730》前聯合創辦人及執行董事馮振超出任營運總監，但股價今日先發力，今朝高開12%後，升幅一度收窄，但午後開始有買盤跟進，股價升幅亦顯著擴大，尾市夾多浸，刷新日內高位，收市升逾42%，報0.81元，成交股數較過去100日同時段平均大增26倍，全日成交金額逾500萬元。
毛記於2018年上市，公開招股超額認購近6289倍，上市初期股價曾衝上10元樓上，但之後好快回落，亦一直冇起色。及至舊年8月「腦細」林日曦突然離職，股價單日挫9%，今次有來自主流媒體嘅高層加盟，未知公司未來經營方針會唔會有變。
毛記股價今日喺成交配合下大升，但要留意RSI已經上到70嘅超買水平，小心股價短期有超買回調風險。
