【Now財經台】本港入境檢疫政策或有望放寬至「0+7」，反觀內地暫時未有鬆綁跡象，唔少行業包括速遞行業仍靜待疫後復甦。噚日喺A股上市嘅順豐，喺香港上市嘅圓通速遞國際(06123)等出咗8月營運數據，表現都算唔錯，其中以順豐表現最強勁，但旗下喺香港上市嘅順豐同城(09699)，不論業績及股價上都冇受惠，至於嘉里物流(00636)業績雖然有增長，但近期股價走勢都麻麻，點解會出現呢個情況？
獨立股評人莫灝楠指，嘉里物流由郭鶴年家族持有，喺香港、馬來西亞、內地都有物流設施，所以業績喺兩三年前已經慢慢上返嚟，加上內地依家仍未完全開放，所以業績依家較為平穩都係正常，而股價跟得冇咁足亦係正常。至於順豐同城及順豐房託(02192)同母公司關聯性唔係咁大，所以如果想買某啲股份，去捕捉返順豐業績增長等係好難。
