【Now財經台】新華保險(01336)股價今朝低開近2%後，愈跌愈多，一度低見16.24元，跌至逾2年低位，開市約1小時，成交已經係逾1年最多，亦較過去100日同時段激增10倍。
開市前，公司錄得1宗大手成交上板，每股作價16.135元，涉及2616萬股、涉資及4.22億元，上板價較噚日收市價折讓5.7%，暫時即市低位仲未失守大手上板價。
開市前有大手成交上板，自然令人聯想到有股東減持，集團H股股東包括近日市場風眼復星國際(00656)，復星持有新華保險約1.7億股H股，佔已發行H股股本17.1%，今朝呢批貨係咪復星沽，就要觀望之後有冇公布。
