【Now財經台】線上醫療股叮噹健康(09886)今日首掛，開市報12.34元，較招股價12元，高近3%，其後走勢轉弱，收市價同上市價持平，喺跌市中表現已算硬淨。
華盛証券分析師聶振邦認為，除咗背後保薦人中金公司(03908)同招銀國際護盤有功，更因為呢隻新股由大戶主導。佢指出，股份公開發售部分冇觸發回撥，但一手中籤率只得12%，而大戶參與嘅國際配售部分就啟動咗超額配股權，反映大戶可能唔傾向畀散戶接貨。
聶Sir估計，大戶佔股份街貨量約87%，貨源高度歸邊，所以股價會企得較穩，如果叮噹健康股價首1至2周有得升，建議有貨嘅股民可先行止賺。
佢又提及噚日開始招股嘅數科集團(02350)，既冇明星級保薦人，亦唔似叮噹健康咁股權集中喺大戶手中，「潛水」風險較大，佢建議可以等上市後再決定入唔入手。
