【Now財經台】繼新冠病毒後，年中喺歐洲爆發嘅猴痘傳染病，成為各國關注嘅公共衛生事件，中國衛生(00673)亦睇準有關商機，噚日收市後公布，斥資400萬元入股研發猴痘病毒快測試劑盒公司Trillion Silver Limited，持股20%。
雖然集團話今次入股可提升盈利能力，但值得留意係，Trillion Silver研發嘅猴痘病毒快測試劑盒仍然喺研發階段，仍未正式推出市場，最終係咪成事仲有不確定性。
睇返中國衛生技術走勢，股價上月展開升浪，當時集團完成「10合1」，之後股價愈升愈有，今日更衝破上星期四嘅前頂部，升上逾兩年高位，但成交未見急升，14天RSI亦未破前頂，同股價走勢出現背馳，可能預示升勢短期已見頂。
