【Now財經台】有教育業務嘅SaaS(軟件即服務)股天潤雲(02167)6月尾掛牌，上市2個幾月成交淡靜，唔夠1個月就失守招股價12.85元，8月尾更跌至低位6.48元。不過，股份創新低後連日反彈，今日更大升近13%，收報10.1元。呢個走勢係咪受典型半新股炒法帶動，有大戶開始炒貨源供需？
華盛証券分析師聶振邦指，現時天潤雲貨源非常集中，根據CCASS(中央結算系統)嘅持股紀錄顯示，天潤雲共有80名參與者，而一般會有100名以上，而頭4名參與者佔街貨約83%，分別係滙豐銀行、中國國際金融、摩根大通、摩根士丹利，一般嚟講，呢個比例超過80%就反映貨源高度歸邊，呢啲大戶仲未沽貨，令股份成交偏低。
聶Sir認為，隨著股價回穩，大戶可能會派返部分貨出街，預期仲有約20%潛在升幅，有機會上返招股價。
