【Now財經台】截至早上11時止，1小時内《彭博》用戶關注度上升最多港股，依次為遠洋集團(03377)、萬科企業(02202)、龍光集團(03380)、合景泰富集團(01813)及普拉達(01913)。
人民銀行噚日宣布，下周四起下調外匯存準率2個百分點，內地及本港內房物管股今日集體反彈，不過，其實要放寬銀根先真正幫到內房，外匯存準率同放寬銀根似乎關係唔大，點解內房今日仍然炒得起？
資深證券分析師彭偉新指，股價反彈唔係由政策實際操作帶動，而係市場相信人行減外匯存準率後，就有機會降準，咁先可以有效控制人民幣貶值速度及經濟放緩速度。佢又話，今次減外匯存款率嘅幅度較大，觸發投資者憧憬更多措施出台，導致對內房睇法轉向正面。不過，彭偉新認為，內地居民買樓自用誘因唔多，喺經濟增長放緩及消費動力減弱下，要透過降準「放水」間接刺激經濟，繼而帶動房地產市場，呢個過程會較為漫長，因此，就算降準都未必可以令內房起死回生。
