【Now財經台】藥明巨諾(02126)即日起被踢出深交所港股通名單，股價今朝輕微低開後，愈跌愈多，下午跌幅進一步擴大，收市報4.26元，瀉近30%，被剔出前北水持股比例近16%，根據深交所條例，被剔出後只可以賣出，不可買入，喺資金有出冇入下，股價好難有支持。
藥明巨諾去年下半年起開始有收入，但至今仲未有錢賺，收入來源主要來自上年獲內地藥監局批出商業化嘅唯一一款產品，即治療淋巴瘤藥物倍諾達，但內地CAR-T市場競爭大，所以有分析質疑藥明巨諾係咪可以好快有錢賺，去年9月獲批商業化，股東淡馬錫同月減持股份，股價今日見過上市新低，喺多項不明朗因素困擾下，暫時睇唔到反彈動力。
