【Now財經台】新冠疫苗概念股復星醫藥(02196)股價今朝破底，集團上周五收市後公布，控股股東擬透過集中競價，同埋大宗交易方式減持不逾3%復星醫藥A股。
消息拖累復藥股價今朝裂口低開近6%，破底之餘仲愈跌愈多，跌幅一度擴大至逾12%，低見22元，跌至兩年低位，成交亦顯著增加，反映沽壓沉重，成交股數較過去100日同時段增近4倍。
集團之前同德國BioNTech喺上海成立合資企業，聯手生產mRNA新冠疫苗復必泰帶來嘅升幅，全數蒸發之餘仲要跌凸，隨著市場未來對新冠疫苗需求或隨著呢場大流行有望完結而減少，睇嚟股價未來都唔係太樂觀。
