【now.com財經】今朝悶還悶，但都揀咗隻恒指熊(67990)出嚟，Set好吼五分鐘50分鐘線(五分鐘圖10線)或100分鐘線(五分鐘圖20線)見阻力就出落場，仲諗住今日會波幅好細，點知10點打後開始嚟料。以Patreon出文時間為10點2分，On top用10分鐘時間睇文，即10點12分，好計數啲睇10點10分，當時指數已經失守19,500點，即係話第一層牛證街貨19,500至19,599點全數死亡，當然呢個時侯指數同50分鐘線或100分鐘線嘅距離更係遠咗啦，呢個位如果出隻(67990)的話，可以，以期內(67990)高低位做過0.076元/0.068元，平均買入價為0.072元。
不過，落場之後就會見到指數原來就正正喺10點20分做咗上半場低位19,392點，之後指數回升，10點45分指數喺五分鐘圖上已經重上50分鐘線，(67990)似乎係時侯要止蝕，以10點45分On top加10分鐘作為走貨時間，期內(67990)高低位做過0.073元/0.069元，平均走貨價為0.071元，平均輸一格或1.39%再加手續費。
唔走仲麻煩，指數之後喺11點20分上破埋條100分鐘線，去到上半場完場時，隻(67990)證價得返0.068元，同平均買入價比，係，只係爭四格，我相信大把人可以承受得到呢個幅度，但勢唔啱嘅情況之下，四格隨時會繼續放大上去，咁就真係麻煩啦。
至於隻過夜恒指熊(67548)午後返嚟見到，依家1點15分，小時圖上暫時出現咗爭三點嘅「平底」，當然依家確唔確認到係「平底」言之尚早，要等到2點先知，但事實係暫時見到19,4XX點呢個位都真係出到支持，只係貪心鬼會著眼於保歷加通道口仍然拓闊。
再睇埋個日線圖，上個星期畫到依家嘅「長方形」，今日見終於又落返去「長方形」嘅底部，哦，咁明明地點解指數落到19,4XX點之後就止步，因為下面啲牛真係好肥，肥到脂肪多過肉。
又咁講，阿市的確有權唔食嘅，更何況今日星期五，(67548)再過夜就過Weekend架啦。依家1點24分，見指數又再向19,400點出發，隨時又穿多一下，五分鐘圖上見保歷加通道口拓闊中，Slow STC(14,3)兩線落到超賣，有行超賣再超賣，應該可以喺呢一轉下行走隻(67548)唔過夜收工啦！
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
