【Now財經台】心動公司(02400)股價今朝輕微低開後，不久已掉頭向上，公司中午出咗上半年業績，股價午後一度升幅擴大，曾高見20.4元，升逾10%。心動公司中期虧損擴大至3.9億人仔，除咗收入、毛利有增長，其他都係倒退。不過，遊戲業務表現唔錯，收入增長8%，佔比最大嘅網絡遊戲更錄得雙位數增長，係咪同疫情防控令唔少人要在家工作帶挈公司？
華盛証券分析師聶振邦指，市場除咗睇大數，亦會睇營運數據，雖然網絡遊戲平均月活躍用戶倒退2%，但月付費用戶大幅增長90%，因此，市場對心動公司下半年，以至明年嘅前景有一定憧憬。
聶Sir又指，雖然內地推出政策限制未成年玩網絡遊戲，但似乎唔會禁成年人打機，加上WFH增加對付費遊戲嘅需求，因此，佢認為付費遊戲前景值得憧憬。
