【Now財經台】HKTVmall母公司香港科技探索(01137)(HKTV)噚日收市後出咗業績，股價今朝高開逾7%後，升幅一度擴大至逾23%，高見5.83元，股價喺大成交下升上半個月高位，但喺100天線及5.9元阻力位止步。
HKTV中期多賺逾33%，維持派息8仙，營業額增長26%，定單總商品交易額升37%。除咗按年有得升，更扭轉舊年下半年嘅虧損情況，管理層指，網購受疫情刺激快速增長，雖然疫情退卻，但營業額仍按年有得升，令今年定單總商品交易額達標。此外，集團期望未來力拓第三方物流服務。至於大和亦將HKTV評級由「持有」上調至「跑贏大市」。
除咗期內毛利率跌，各項成本亦開始上升，加上市場競爭激烈，部分投資者先行獲利，導致高位回套，後市要留意完成整固後，有冇力升穿5.9元，同埋未來嘅月度數據係咪可以保持強勢。
