【Now財經台】豪華車經銷商永達汽車(03669)股價6月後展開跌浪，至今累跌逾30%，公司中午出咗上半年業績，少賺42%至6.7億人仔，收入亦跌22%，股價今日由頭跌到尾，收市跌逾3%。
除咗新車銷售，售後服務亦係永達好重要嘅分部收入，睇返過去5年盤數，售後服務大部分時間維持近20%增長，但今年罕有按年跌近20%。
元宇證券投資總監林嘉麒分析指，永達主要喺上海經營業務，而上半年長達2個月嘅封城措施，令集團完全停止售後服務，所以第2季就要蝕錢，此外，公司未有喺業績提及售後服務有復甦動力，所以畀唔到信心投資者。
但KK認為，新嘅二手車經銷業務按年增長近57%，值得憧憬，因為毛利率比賣新車高，加上經濟疲弱時有更大需求。
KK又話，相比其他汽車股，永達股價算守得住，加上現時預測市盈率(PE)唔夠4倍，估值唔算高，相信唔會跌穿年內低位。
