【Now財經台】截至早上11點止，1小時內《彭博》用戶關注度上升最多港股，依次為中國信達(01359)、港交所(00388)、中國石油化工(00386)、美團(03690)、遠洋集團(03377)。
信達今日出業績，但股價偏軟，半日跌1.8%，報1.08元，股份今日登上榜首，更大可能同《彭博》今朝嘅報道有關，信達呢類國有資產管理公司，唔會係中央處理內房危機時嘅「白武士」人選。
信達專門處理壞帳，但近幾年呢類公司嘅財務表現因為收得太多壞帳，都搞到自身難保。
富昌證券聯席董事譚朗蔚認為，應該係好多投資者喺《彭博》搜尋信達嘅財務狀況，以了解公司潛在資產惡化風險。Stevan又話，唔好因為信達突然成為市場焦點，而對股份有太大憧憬。
