【Now財經台】康方生物(09926)今朝平開後一度跌6%，後來倒升，午後升幅進一步擴大至最多13%，高見23.3元，收市報22.4元，升8%，成交金額比上日大增至逾2.8億元。
公司上日收市後公布中期業績，係上市以嚟第一個錄得產品銷售收入嘅上半年業績，上半年收入2.97億人民幣，收入唯一來源係上年8月先至獲批上市嘅抗癌藥「安尼可」，扣除銷售成本後有1.63億元收入，但由於研發開支增至近6億元，中期虧損擴大至6.3億元。
股價方面今日升穿10及20天線，不過投資者要注意，公司喺7月以24.27元配股，集資5億元，當時有3個月禁售期，到10月先可以解禁。而公司2020年上市以嚟，已經做咗2次配股，所以都要小心公司有資金壓力時會再做配股。
