【Now財經台】敏實集團(00425)股價跑贏大市，高開3%後升幅一度擴大至逾15%，暫時係九個月以嚟最大單日升幅，公司噚日收市後出咗業績，中期收入升9%，股東應佔溢利減少27%，毛利率跌2.8個百分點，維持唔派中期息。
雖然敏實純利按年跌，但較去年下半年有改善，股東應佔溢利較去年下半年升10%，毛利率亦較去年下半年向上。
大摩指，敏實中期業績冇預期咁驚嚇，維持其「增持」評級及28元目標價；瑞信則上調目標價預測，由25元升至26元，維持「跑贏大市」評級。
值得留意係，敏實股價高位有沽壓，過去幾次去到23元前又要掉頭向下，要留要之後會唔會有更多唱好報告，進一步提振股價。
