【Now財經台】美東汽車(01268)下晝跌幅擴大，一度大跌逾9.4%，低見15.02元，收市報15.22元，跌逾8.2%。
美東噚日發咗盈警，預期上半年盈利按年將錄得跌幅，主要受新冠疫情影響，導致新車銷售按年跌最多10%。睇返股價表現，市場明顯唔收貨，可能因為公司自2015年開始，連續6年嘅上半年純利都有增長，但今年就斷欖。
股價方面，美東股價跌至26個月低位，但仍處於今年以來嘅下降通道內，期間RSI曾兩度出現嚴重超賣訊號，但股價始終反彈乏力，後市要留意業績後，美東股價係咪要繼續下試通道底部。
