【Now財經台】思捷環球(00330) 噚日收市後發盈警，料上半年少賺89%，集團解釋，主要受歐元貶值拖累，令期內收入下跌，加上錄得外匯匯兌虧損9900萬元。
受消息拖累，思捷股價今朝裂口低開逾12%，其後跌幅一度擴大至逾24%，低見1.16元，重返3月至4月股價異動嘅起步點，股價最新續於低位徘徊，成交都幾活躍，成交股數較過去100日同時段大增6倍。
值得留意係，市場再度擔心俄羅斯入冬後會唔再向歐洲供應天然氣，拖累歐元跌穿1算，創20年新低，思捷主要業務仲喺歐洲，估計歐元弱勢會繼續困擾集團業務。
