【Now財經台】金風科技(02208)上半年收入跌8%，純利則跌近6%，當中佔收入比重近70%嘅風力發電機組及零部件銷售收入，跌近16%至約108億人仔，集團解釋，主要係「海上風電平價時代」來臨，導致海上風機銷售容量下跌，市場似乎對呢份業績唔收貨，金風股價今日喺大成交下，一支大陰燭跌穿250天線，即14元，收市重挫逾14%，報12.58元。
英皇證券研究部總監陳錦興指，將金風上半年純利19億人仔，減返第1季純利，即第2季只賺6.6億人仔，遠差過市場預期，佢又話，金風股價5月起走強，投資者可能覺得對比業績表現，金風股價升凸咗，所以今日沽壓湧現。
Stanley預期，金風股價上到13元水平，可能再有一批走唔切嘅人再沽貨，雖然今年預測PE僅14倍，但現時仍未係吸納時機。
