【Now財經台】內地旅遊概念股海昌海洋公園(02255)主要經營位於武漢、成都、天津、青島嘅海洋主題公園，近2年一直蝕錢。今朝更出盈警，預告上半年淨虧損擴至最多5.5億人仔，直逼2020年末疫情高峰後水平。集團6月初曾經「抽水」，但配股後股價不跌反升，究竟呢隻股份有咩乾坤？
《香港股票財技密碼》作者梁杰文認為，海昌以前太依賴門票收入，於是疫情爆發後閉園就斷咗財路，不過，公司依家開始重視周邊產品及餐飲服務收入，近月跟第三方合作增加主題公園嘅文旅知識產權(IP)項目，以及銷售相關產品，更委任前香港迪士尼CEO金民豪為亞太區總裁，呢啲動作都反映公司有心改革，相信業績有望扭虧為盈。
不過，Mike亦指出，海昌估值過高，股價嘅上升軌跡可謂「反地心吸力」，海昌股價今年累升逾3倍，較兩年前更勁升近20倍，估計短期內會出現大調整，即使中信証券估計海昌9月初有望以「非核心消費類股份」成北水新貴，但Mike強調不宜高追。
