【Now財經台】美股經過近月反彈，不經不覺已反超前港股，睇返今年以來追蹤指數幾隻主要ETF，恒指累跌約13%，標指跌幅就收窄至約10%，美股可以續反彈，加息預期降溫係咪最大推動作用？還是已走出經濟陷入技術性衰退陰霾？
方德金融控股投資策略師鍾駿指，經濟扭轉劣勢或擺脫技術性衰退，都係言之尚早，但無可否認美股過去幾個月表現真係非常好，亦比港股強勢好多，香港投資者應該留意加息預期、通脹等數據，因為對大市有一定影響。
睇返美匯及債息近期表現，係咪反映市場已經唔再驚加息？Stephen認為，如果睇返最新數據，依家市場預期聯儲局9月加息0.5厘嘅機會較大，約60%，但仍有40%認為會加0.75厘，呢個都唔可以忽視，因為仍有官員放風話傾向加0.75厘。佢又話，若美國下次公布嘅通脹數據再度升溫，而市場仍預期加息0.75厘，相信市場已有充分預期，但有一個較大憂慮係，一旦通脹突然再急升，令市場預期聯儲局會加息1厘，影響就會幾大。
