【Now財經台】海天國際(01882)今朝輕微高開，之後最多升7%，高見18.38元，成交金額超過2200萬元。
海天國際日前公布中期業績後，股價受壓，跌至約五個月低位，不過今日有反彈，收復哂上日失地。中期業績因內地疫情封控及外圍宏觀環境唔明朗，一如預期差，收入及盈利都向下，但開完分析員會議後，大摩發表報告，引述管理層唔少樂觀嘅睇法，預料下半年收入可以維持上半年水平或有輕微增長。花旗將海天國際評級連升兩級，由「沽售」調高至「買入」，股價今日隨即反彈。
雖股價有得升，但成交仍少過上日跌市，睇多兩日係咪可企穩18.1元，呢個過去大半年嘅支持位，以及十天線，即係約18.34元呢個位。而股價暫時仍受制於6月拉出嚟嘅下降趨勢線，後市要留意下半年新能源車市場需求復甦進展，對公司產品需求嘅刺激，以及公司新開拓嘅海外市場對收入、毛利嘅支持。
