【Now財經台】東方海外國際(00316)股價今日「沉船」,一度急挫近16%,睇返集團派息比率,去年中期高達100%,預期今年中期回落至70%,不過,滙豐證券仍估計,今年預測股息率有34厘,以上周五收市價265元計,即每股派息90元,但股價跌到咁,值唔值得為博收高息買入?
紅蟻資本投資經理李澤銘坦言,東方海外值博率已愈來愈低,之前投資者唔揀中遠海控(01919),係因為去年東方海外幾乎將賺到嘅錢都派晒出去,令小股東有現金回報,相反,雖然中遠海控估值較平,亦賺到錢,但唔派息,長遠嚟講,投資者買中遠海控都回唔到本,不過,由於現時航運相關行業轉差速度比想像快,若繼續揸住東方海外,有機會贏股息輸凸價。