【Now財經台】太古(00019)中午派成績表時,罕有宣布回購計劃,「A+B」回購涉資40億元,但睇返2008年,集團1年內做咗13次回購,只係涉及逾5億元,所以今次回購力度絕對唔細,市場除咗關注背後係咪另有玄機外,亦刺激股價午後抽升,一度迫近50元關口,大升逾10%,到底呢浸升浪可以持續幾耐?
耀才證券研究部總監植耀輝指,太古一向低調,但今次做法較高調之餘,涉及嘅金額都好大,所以消息一出,股價就應聲抽高,市場亦會憧憬集團回購後,仲會唔會有其他動作。
Stanley又話,雖然好多公司做回購係因爲股價同NAV有好大折讓,但太古嘅折讓唔係呢一刻先出現,有可能係集團有較多閒置資金,希望透過做回購提升每股資產淨值。