【Now財經台】截至早上11時止，1小時內《彭博》用戶關注度上升最多港股，依次為龍湖集團(00960)、中國海外發展(00688)、建設銀行(00939)、聯想集團(00992)、港交所(00388)。
龍湖股價今朝一度勁彈逾11%，高見23.2元，但仍未全數收復噚日嘅失地，雖然大行話龍湖冇即時、短期違約風險，但睇股價表現，似乎仍未挽回到市場信心，市場原本認同龍湖係最穩健嘅民企內房，但噚日傳聞一出，投資者即爭相掟貨。
椽盛資本投資總監曾永堅指，自7月上旬開始，不論民企或國企內房都要跌，主要係近一兩年市場嘅憂慮，已由內房財務狀況擴至整個內房市場危機，龍湖近期財務狀況其實唔差，噚日急瀉可能因謠言被放大，而下半年內房銷售亦可能進一步惡化，令潛在買家延後置業決定，甚至擱置置業需求，依家好多地方政府都千方百計提升潛在需求，不過，若內房陷入惡性循環，就未必可以持續，佢又認為，如果龍湖未來幾個月銷售有改善，畀到市場信心，股價之後先會出現真正嘅反彈。
