【now.com財經】今朝揀咗隻恒指熊(63582)，講明係要等指數喺五分鐘圖上彈高先至出動嘅「蛋糕熊」。不過，恒指今日開市之後就一直向下挫，跌到10點50分，做出「十字星」兼見低位19567點先至識得停，本以為呢一趟向下行嘅Swing會結束，嗯...嚴格嚟講之後指數同Slow STC(14,3)喺五分鐘圖上見回升，都真係可以話出咗新一趟嘅Swing Trade走勢嘅，只係之後嘅Slow STC(14,3)兩線行到上25/22就見回，指數亦重上返196以上之後，於11點40分再做出上半場低位19565點，同10點50分嘅「十字星」低位相約，之後指數橫行至上半場完。而19,56X點呢個位又可唔可以拉到條橫行定住係今日嘅低位呢？技術上暫時可以，不過以上半場收市時先指數處於保歷加下降通道，依家保歷加通道口收窄啫，萬一下半場返嚟保歷加通道口又再拓闊的話，指數隨時劍指19,500至19,599點全層全貨牛。
而(63582)成個上半場都搵唔到一個適合做Swing Trade出淡倉嘅位落場，只係作戰室再配合埋Day Trade硬闖方法，算是用三次淡倉食到全程下行。
今日Lunch time時段我家肥貓仲瞓喺佢個袋仔度，無出嚟討吃，我自己食完嘢再上網Search Selenium嘅補充品(醫生確認我患有甲亢嘅Day 1開始就叫我食，仲要係最重份量嗰隻)，雖然只係藥一樽，但一開購物網，作為一個女性+C9就好容易會陷入咗Shopping嘅境地，醒覺嘅時侯，已經1點24分，恒指下半場開咗市，好彩捉得住喺下晝1點10分至1點15分見指數上破唔到中軸之後有緩緩向下嘅情況，再加上保歷加通道口有重新拓闊嘅走勢，但保歷加通道頂至底得86點差距，我都怕呢趟中軸唔過再向下嘅Swing隨時被窄窄的保歷加通道收皮，都係等稍後保歷加通道口再拓闊返少少先算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
