【now.com財經】今朝揀咗隻恒指熊(63448)出嚟，已經諗住等五分鐘圖上見指數稍為喘定或「蛋糕」遇阻先至再落場。指數喺10點30分有上過保歷加通道中軸後向下回落，吼呢個位出隻(63448)正路不過，喺10點30分起計10分鐘內出隻(63448)，以期內高低位0.076元/0.069元計，平均買入價為0.0725元。
但其實入咗隻(63448)10分鐘之後，已經見到指數再次挑戰保歷加通道中軸，比多五分鐘過埋，而喺作戰室裡面自己都有同戰友s講話指數行出「身懷六甲」嘅形態，再加上喺10點時低位做出完美嘅T星，其實作戰室仝人一早反晒手做好倉，隻(63448)用咗進取方法，即見保歷加通道中軸遇阻而出，但依家指數已經上破咗呢個預定嘅阻力，(63448)亦理應立斬。以10點55分見指數確認上破後On top加10分鐘走(63448)，其內高低位見0.07元/0.065元，平均走佬價為0.0675元，平均蝕五格或6.9%。呢一下唔走，隻(63448)幾乎被打靶咁滯，事關之後有傳取消內地客買樓嘅DSD，啲地產股同美聯(01200)推到上天花板，恒指由跌百幾點倒升近200點，殺完第一層牛證之後反手爭50點就殺晒第一層熊證，預期話左一巴右一巴，倒不如話個市上下其手仲好。
下半場開市之後，首五分鐘見到指數於高位向下回落，仲出現「大陰燭」形態向住保歷加通道中軸出發，望望鐘依家1點6分，同步電話光咗一下，收到Message話「財政司司長辦公室針對有報道指政府考慮放寬物業印花稅，澄清沒有相關討論，指無任何相關計劃。」再有多一個Message係「葉劉淑儀：撤內地買家在港置業DSD屬新民黨意見」，然後作戰友傳來一個Comment「本節目乃嘉賓之個人意見」，咁真係如有雷同，實屬巧合啦。
依家1點16分，指數下半場出完一支「大陰燭」後落到保歷加通道中軸，唯同時保歷加通道口有收窄情況，而且比較明顯，即係暗示緊指數將會進入一個橫行狀態，Slow STC(14,3)同步見有於中軸作勢橫行嘅情況，呢啲位落場就真係同賭大細無分別啦，今日無啦啦被葉劉姨姨嚇一嚇，下半場都係休息下算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
