【股市脈搏】中梁控股違約涉千萬美元要小心

【Now財經台】中梁控股(02772)上午表現平穩，午後股價突然抽高，一度升23%，高見1.11元，最終升逾7%收市，報0.97元，成交股數較過去100日同時段多7倍。

今年3月，碧桂園服務(06098)用約31億人民幣收購中梁物業，中梁控股嘅大股東雖然喺嗰次出售中套現，但筆錢似乎唔打算投入內房公司，喺8月初，中梁控股仍有一筆1200萬美元，即約1億港元嘅優先票據未償還本金及利息而違約。

今日股價雖然有異動，但公司財政唔太健康，大股東有錢但冇乜表示，後市要繼續小心呢隻股份。